ನನ್ನ ಬ್ಲಾಗ್ ಪುಟಕ್ಕೆ ಆತ್ಮೀಯ ಸ್ವಾಗತ, ನಿಮ್ಮ ಅನಿಸಿಕೆಗಳನ್ನು ತಿಳಿಸಿ(ನಿಮ್ಮ ಅನಿಸಿಕೆಗಳೇ ನನ್ನ ಬರವಣಿಗೆಗೆ ಸ್ಪೂರ್ತಿಯಾಗಲಿ) ಫೋಟೋಗಳನ್ನು ನೋಡಲು ನನ್ನ ಫೋಟೋ ಗ್ಯಾಲರಿ ಗೆ ಹೋಗಲು ಇಲ್ಲಿ ಕ್ಲಿಕ್ಕಿಸಿ

Saturday 10 October 2009

ಡೈರೆಕ್ಟ್ ಟು ಹೋಮ್(DTH) ಸೇವೆ ಬರುವ ಮುನ್ನ ಹಳ್ಳಿಗಳಲ್ಲಿ ಟೀವಿ ವೀಕ್ಷಣೆ ಹೇಗೆ ಸಾಧ್ಯವಿತ್ತು

ಡೈರೆಕ್ಟ್ ಟು ಹೋಮ್




 (ಉಪಗ್ರಹದಿಂದ ನೇರ ಮನೆಗೆ) ಸೇವೆಯನ್ನು ವಿಸ್ತರಿಸಿ ಹೇಳುವುದಾದರೆ ಉಪಗ್ರಹದಿಂದ ನೇರವಾಗಿ ನಿಮ್ಮ ಮನೆಗೆ ಡಿಶ್ ಮತ್ತು ರಿಸೀವರ್ ನ ಮೂಲಕ ನಿಮ್ಮ ಆಯ್ಕೆಯ ಎಲ್ಲಾ ಚಾನಲ್ಲುಗಳನ್ನು! (ಸೇವಾದಾರರು ನೀಡಿದ ಪ್ಯಾಕೇಜ್ ಆಯ್ಕೆ ಮಾಡಿಕೊಂಡು) ದುಡ್ಡು ಕಟ್ಟಿ ನೋಡಬಹುದು, ಡಿಟಿಹೆಚ್ ಬಗ್ಗೆ ಯಾರಿಗೆ ಗೊತ್ತಿಲ್ಲ ಮತ್ತೆ ಯಾಕೆ ಹೇಳ್ತಾ ಇರಬಹುದು ಯೋಚಿಸುತ್ತಿರುವಿರಾ?

     ಹೌದು ನಾನು ಹೇಳಲಿಕ್ಕೆ ಹೊರಟಿರೋದು ಉಪಗ್ರಹದಿಂದ ನೇರ ಮನೆಗೆ ಉಚಿತವಾಗಿ ಲಭ್ಯವಿದ್ದ ಸೇವೆಯ ಬಗ್ಗೆ! ಡಿಟಿಹೆಚ್ ಸೇವೆ ಭಾರತದಲ್ಲಿ ಆರಂಭವಾಗಿ ಅಬ್ಬಬ್ಬಾ ಎಂದರೂ ಎರಡರಿಂದ ಮೂರು ವರ್ಷ ಆಗಿರಬಹುದು,ಆದರೆ ನಮ್ಮ ದೇಶದ ಹಳ್ಳಿಗಳಲ್ಲಿ ಡಿಟಿಹೆಚ್ ಸೇವೆ ಆರಂಭವಾಗುವ ಮೊದಲು ಮತ್ತು ಕೇಬಲ್ ಸೇವೆ ಲಭ್ಯವಾಗದಂತಹ ಪ್ರದೇಶಗಳಲ್ಲಿ ಟಿವಿ ಚಾನಲ್ಲುಗಳನ್ನು ಹೇಗೆ ನೋಡುತ್ತಿದ್ದರು ಎಂದು ನಿಮ್ಮಲ್ಲಿ ಅನೇಕ ಜನರಿಗೆ ಕುತೂಹಲ ಇರಬಹುದು, ಹಳ್ಳಿಗಳಲ್ಲಿ ಅತಿ ಹೆಚ್ಚಿನ ಮನೆಗಳಲ್ಲಿ ಉಪಗ್ರಹದಿಂದ ನೇರ ಮನೆಗೆ ಸಂಪೂರ್ಣ ಉಚಿತ ಸೇವೆ ಬಳಸುತ್ತಾ ಹತ್ತು ವರ್ಷಗಳಿಗಿಂತಲೂ ಹೆಚ್ಚಿನ ವರ್ಷಗಳು ಕಳೆದಿವೆ, ಇದನ್ನು ಕೇಳಿ ನಿಮಗೆ ಆಶ್ಚರ್ಯ ಆಗಬಹುದು. ಆದರೆ ಇದು ನಿಜ. ನನಗೆ ಗೊತ್ತಿರುವ ಪುಟ್ಟ ಮಾಹಿತಿ ನಿಮ್ಮ ಮುಂದಿಡಲು ಪ್ರಯತ್ನಿಸುತ್ತೇನೆ. ಮೊದಲು ಹಳ್ಳಿಗಳಲ್ಲಿ ಮನೋರಂಜನೆಗಾಗಿ ಟಿವಿ ಮಾಧ್ಯಮದ ವೀಕ್ಷಣೆಗಾಗಿ ಅತಿ ಹೆಚ್ಚು ಖರ್ಚು ಮಾಡಬೇಕಾಗಿದ್ದು ಅನಿವಾರ್ಯವಾಗಿತ್ತು...


     ಹಳ್ಳಿಗಳಲ್ಲಿ ಮೊದಲು ಬಂದಿದ್ದು ದೂರದರ್ಶನ್ ( ಇದು ಡಿಡಿ) ಚಾನಲ್ಲುಗಳು, ಆರು ಅಡಿಯ ಡಿಶ್ ಹಾಗೂ ಎಸ್ ಬ್ಯಾಂಡಿನ  ಎಲ್ ಎನ್ ಬಿ (LNB)  ಮತ್ತು   ಅನಲಾಗ್ ರಿಸೀವರ್ ಮೂಲಕ ಡಿಡಿ ನ್ಯಾಶನಲ್ ಹಾಗೂ ಇನ್ನೊಂದು ಪ್ರಾದೇಶಿಕ ಚಾನಲ್ಲು ಒಟ್ಟು ಎರಡು ಟಿವಿ ಚಾನಲ್ ನೋಡಬಹುದಾದ ಉಚಿತ ಉಪಗ್ರಹ ಸೇವೆ ಲಭ್ಯವಿತ್ತು, ಅದಕ್ಕೆ ತಗಲುತ್ತಿದ್ದ ವೆಚ್ಚ ಸುಮಾರು ಆರರಿಂದ ಎಂಟು ಸಾವಿರ ರೂಪಾಯಿಗಳಿರಬೇಕು ಅಷ್ಟು ಸರಿಯಾಗಿ ನೆನಪಿಗೆ ಬರುತ್ತಿಲ್ಲ, ಅದು ಅಷ್ಟು ಜನಪ್ರಿಯವಾಗಲೂ ಇಲ್ಲ, ನಂತರ ಬಂದಿದ್ದು ಸಿ-ಬ್ಯಾಂಡ್ ಎಲ್ ಎನ್ ಬಿ ಮತ್ತು ಅನಲಾಗ್ ರಿಸೀವರ್, ಇದು ಅನೇಕ ವರ್ಷಗಳವರೆಗೆ ಚಾಲ್ತಿಯಲ್ಲಿ ಇತ್ತು, ಇದರಲ್ಲಿ ಡಿಶ್ ಹನ್ನೆರಡು ಅಡಿ ಅಥವಾ ಎಂಟು ಅಡಿಯದ್ದಾಗಿದ್ದು ಅದನ್ನು ಬೇರೆ ಬೇರೆ ಸ್ಯಾಟಲೈಟ್ ಗಳ ದಿಕ್ಕಿಗೆ ಹೊಂದಿಸಿ ಬೇರೆ ಬೇರೆ ಚಾನಲ್ಲುಗಳ ತರಂಗಾಂತರಗಳನ್ನು ಪಡೆಯಲು ಶಕ್ತವಾಗಿದ್ದವು ಆದರೆ ಈಗಿನ KU-BAND DTH ಸೇವೆ ಪಡೆಯಲು ಕೇವಲ ಎರಡು ಅಡಿಯ ಡಿಶ್ ಇದ್ದರೆ ಸಾಕು, ಆದರೆ ಸಿ ಬ್ಯಾಂಡಿನ ಸಿಗ್ನಲ್ ಪಡೆಯಲು ದೊಡ್ಡದಾದ ಡಿಶ್ ಅವಶ್ಯವಾಗಿ ಬೇಕಾಗಿತ್ತು,

ಅದರಲ್ಲಿ ಮೊದಲು ಬಂದ ಮಾದರಿಯಲ್ಲಿ ಡಿಶ್ ಅನ್ನು ಎಡಕ್ಕೆ ಮತ್ತು ಬಲಕ್ಕೆ ತಿರುಗಿಸಲು ಮತ್ತು ಮೇಲೆ ಕೆಳಗೆ ಅಡ್ಜಸ್ಟ್ ಮಾಡಲು ಬೇರೆ ಬೇರೆ ಎರಡು ಹ್ಯಾಂಡಲ್ ಗಳಿದ್ದವು ಇದು ಸ್ವಲ್ಪ ಕಷ್ಟಕರವಾಗಿತ್ತು,


 ನಂತರದ ದಿನಗಳಲ್ಲಿ ಆ ಮಾದರಿಯಲ್ಲಿ ಸುಧಾರಣೆಯಾಗಿ ಸಿಂಗಲ್ ಪೋಲ್ ಡಿಶ್ ಗಳು ಚಾಲ್ತಿಗೆ ಬಂದವು, ಸಿಂಗಲ್ ಪೋಲ್ ಎಂದರೆ ಡಿಶ್ ನ ಒಂದು ಹ್ಯಾಂಡಲನ್ನು ತಿರುಗಿಸುವ ಮೂಲಕ ಡಿಶ್ ನ ದಿಕ್ಕು ಮತ್ತು ಎತ್ತರವನ್ನು ಹೊಂದಿಸಿ ಬೇರೆ ಬೇರೆ ಉಪಗ್ರಹಗಳಿಂದ ಟೀವಿ ಚಾನಲ್ ಗಳನ್ನು ನೋಡಬಹುದಾಗಿತ್ತು,


 ಇದರಲ್ಲಿ ಲಭ್ಯವಾಗುತ್ತಿದ್ದುದು ಬರೀ ದೇಶೀಯ ಚಾನಲ್ಲುಗಳಲ್ಲದೆ ಅಂತರರಾಷ್ಟ್ರೀಯ ಚಾನಲ್ಲುಗಳು ಲಭ್ಯವಾಗುತ್ತಿತ್ತು, ನೂರಕ್ಕೂ ಹೆಚ್ಚು ದೇಶೀಯ ವಿದೇಶೀಯ ಚಾನಲ್ಲುಗಳು ಉಚಿತವಾಗಿ ಲಭ್ಯವಾಗುತ್ತಿದ್ದವು ಮೊದಲು ಸ್ಟಾರ್ ನವರ ಎಲ್ಲಾ ಚಾನಲ್ಲುಗಳು, ಜೀ ಟೀವಿಯವರ ಅನೇಕ ಚಾನಲ್ಲುಗಳು ಉಚಿತವಾಗಿ ಲಭ್ಯವಾಗುತಿತ್ತು.ಇದೆಲ್ಲವೂ ಅನಲಾಗ್ ತಂತ್ರಜ್ಞಾನದಲ್ಲಿ ಲಭ್ಯವಾಗುತಿತ್ತು. ಅನಲಾಗ್ ತಂತ್ರಜ್ಞಾನದಲ್ಲಿ ಇದ್ದ ಒಂದು ಕೊರತೆಯೆಂದರೆ ಉಪಗ್ರಹದ ಒಂದು ಟ್ರಾನ್ಸ್ಪಾಂಡರಿನಲ್ಲಿ ಒಂದೇ ಚಾನಲ್ಲು ಪ್ರಸಾರವಾಗುತ್ತಿತ್ತು...ಭಾರತದ ಉಪಗ್ರಹದಲ್ಲಿ ಹೆಚ್ಚೆಂದರೆ ೧೨ ಟ್ರಾನ್ಸ್ಪಾಂಡರ್ ಇರುತ್ತಿದ್ದುದರಿಂದ ಕೇವಲ ಹತ್ತು, ಹನ್ನೆರಡು ಚಾನಲ್ ಪ್ರಸಾರ ಸಾಧ್ಯವಾಗುತಿತ್ತು, ಚಾನೆಲ್ಲಿನ ಒಡೆಯರು ತಮ್ಮ ಒಂದೊಂದು ಚಾನಲ್ಲನ್ನು ಪ್ರಸಾರ ಮಾಡಲು ಒಂದು ಟ್ರ್ಯಾನ್ಸ್ಪಾಂಡರನ್ನು ಬಾಡಿಗೆಗೆ ಪಡೆಯುವುದು ಅನಿವಾರ್ಯವಾಗಿತ್ತು.. ಅದಕ್ಕೆ ಅನೇಕ ಚಾನಲ್ ಮಾಲಿಕರುಗಳು ವಿದೇಶಿ ಉಪಗ್ರಹದ ಮೂಲಕ ಚಾನಲ್ಲುಗಳನ್ನು ಪ್ರಸಾರಮಾಡುತ್ತಿದ್ದರು.. ಹೊಸದೊಂದು ಉಪಗ್ರಹ ಉಡಾವಣೆಯಾದ ತಕ್ಷಣ ಅದರಲ್ಲಿ ಬಾಡಿಗೆ ಕಡಿಮೆಯಿದ್ದರೆ ತಮ್ಮ ಚಾನಲ್ ಹೊಸ ಉಪಗ್ರಹಕ್ಕೆ ಬದಲಾಯಿಸುವುದು ಸಾಮಾನ್ಯವಾಗಿತ್ತು... ನನ್ನ ಅನಿಸಿಕೆಯ ಪ್ರಕಾರ ಕೆಲವು ಚಾನಲ್ಲಿನ ಮಾಲಿಕರುಗಳು ಮೊದಲು ಬಾಡಿಗೆ ಕಟ್ಟುತ್ತಿದ್ದ ಉಪಗ್ರಹದವರಲ್ಲಿ ಒಂದು ತಿಂಗಳ ಬಾಡಿಗೆ ಕಟ್ಟದೇ ಬಾಕಿ ಉಳಿಸಿಕೊಂಡು ಮತ್ತೊಂದು ಉಪಗ್ರಹಕ್ಕೆ ಹಾರುತ್ತಿದ್ದರೋ ಏನೋ?... ಟೆಲಿ ಕಮ್ಯುನಿಕೇಶನ್ ನ ಒಳಗಿನ ವಿಚಾರಗಳನ್ನು ಕಲ್ಪಿಸಿಕೊಂಡು ಏನೇನೋ ಬರೆದರೆ ತಪ್ಪಾದೀತು.. ಇರಲಿ ನಮಗೇಕೆ!!
ಅನಲಾಗ್ ರಿಸೀವರಿನಲ್ಲಿ ರೇಡಿಯೋದಲ್ಲಿರುವ ಟ್ಯೂನರಿನಂತೆ ವೀಡಿಯೋ ಮತ್ತು ಆಡಿಯೋ ಟ್ಯೂನಿಂಗ್ ಸ್ಕ್ರೋಲಿಂಗ್ ನಾಬ್ ಇರುತ್ತದೆ ಅದನ್ನು ತಿರುಗಿಸುತ್ತಾ ಹೋದರೆ ಚಾನಲ್ ಟ್ಯೂನ್ ಆಗುತಿತ್ತು.. ಪ್ರತಿ ಚಾನೆಲ್ಲಿಗೂ ವೀಡಿಯೋ ಮತ್ತು ಆಡಿಯೋ ನಾಬ್ ತಿರುಗಿಸ ಬೇಕಾಗಿತ್ತು, ಏಕೆಂದರೆ ದೄಶ್ಯ ಮತ್ತು ದ್ವನಿ ಬೇರೆ ಬೇರೆ ತರಂಗಾಂತರಗಳಲ್ಲಿ ಪ್ರಸಾರವಾಗುತ್ತಿತ್ತು, ಇದರಲ್ಲಿನ ತೊಂದರೆಯೆಂದರೆ ಪದೇ ಪದೇ ಟ್ಯೂನ್ ಮಾಡುವುದರಿಂದ ನಾಬ್ ಸಡಿಲಗೊಂಡು ಟೀವಿಯಲ್ಲಿ ಚುಕ್ಕೆಗಳು ಮತ್ತು ದ್ವನಿ ಸರಿಯಾಗಿ ಕೇಳದೇ ಕರ್ಕಶವಾಗಿ ಕೇಳತೊಡಗುತ್ತದೆ ಮತ್ತು ಇದಕ್ಕೆ ರಿಮೋಟ್ ಸಹ ಇರದೇ ಇದ್ದದ್ದು ಅತಿ ದೊಡ್ಡ ತೊಂದರೆಯಾಗಿತ್ತು, ನಂತರದ ದಿನಗಳಲ್ಲಿ ಅನಲಾಗ್ ರಿಸೀವರಿನ ಯುಗಕ್ಕೆ ಮುಕ್ತಾಯ ಹಾಡಲು ಅವತರಿಸಿದ್ದು ಡಿಜಿಟಲ್ ರಿಸೀವರ್, ಇದರಲ್ಲಿ ಉತ್ಕೃಷ್ಟ ಗುಣಮಟ್ಟದ ವೀಡಿಯೋ ಮತ್ತು ಆಡಿಯೋ ಸೇವೆ ಪಡೆಯಲು ಸಾದ್ಯವಾಯಿತು, ಇದರಲ್ಲಿ ಅತ್ಯುತ್ತಮ ವೀಡಿಯೋ ಆಡಿಯೋ ಸ್ಪಷ್ಟತೆ ಮೊದಲನೆಯದಾದರೆ.. ಉಪಗ್ರಹದ ಒಂದು ಟ್ರಾನ್ಸ್ಪಾಂಡರಿನಲ್ಲಿ ಒಂದಕ್ಕಿಂತ ಹೆಚ್ಚು ಚಾನಲ್ಲುಗಳನ್ನು ಒಂದೇ ತರಂಗಾಂತರದಲ್ಲಿ ಪ್ರಸಾರ ಮಾಡಲು ಶಕ್ತವಾಗಿದ್ದವು.. ಸ್ಯಾಟಲೈಟ್ ಚಾನಲ್ಲಿನ ಒಡೆಯರಿಗೆ ಇದೊಂದು ವರಧಾನವಾಯಿತು.. ಮೊದಲಾದರೆ ಪ್ರತಿ ಚಾನಲ್ಲಿಗೆ ಒಂದೊಂದು ಟ್ರಾನ್ಸ್ಪಾಂಡರಿಗೆ ಉಪಗ್ರಹ ಬಾಡಿಗೆ ಕಟ್ಟಬೇಕಾಗಿತ್ತು.. ಅದೇ ಈಗ ಒಂದು ಟ್ರಾನ್ಸ್ಪಾಂಡರಿಗೆ ಬಾಡಿಗೆ ಕಟ್ಟಿದರೆ ತಮ್ಮೆಲ್ಲಾ ಚಾನಲ್ಲುಗಳನ್ನು ಒಟ್ಟಿಗೆ ಒಂದೇ ಟ್ರಾನ್ಸ್ಪಾಂಡರಿನ ಮೂಲಕ ಪ್ರಸಾರ ಮಾಡಬಹುದು... ಡಿಜಿಟಲ್ ರಿಸೀವರ್ ಗೆ ಡಿಶ್ ಮತ್ತು ಎಲ್ ಎನ್ ಬಿ ಮುಂಚಿನದೆ ಆಗಿದ್ದು ಕೇವಲ ಅನಲಾಗ್ ರಿಸೀವರ್ ಬದಲು ಡಿಜಿಟಲ್ ರಿಸೀವರ್ ಬದಲಾಗಿ ಸ್ಥಾನ ಅಲಂಕರಿಸಿದ್ದು ವಿಶೇಷ.


ಡಿಜಿಟಲ್ ರಿಸೀವರ್ ನಲ್ಲಿ ಚಾನಲ್ ವೀಕ್ಷಿಸಲು ಚಾನೆಲ್ಲಿನ ತರಂಗಾಂತರ(ಫ್ರೀಕ್ವೆನ್ಸಿ) ಮತ್ತು ಸಿಂಬಲ್ ರೇಟ್ ಒಮ್ಮೆ ಫೀಡ್ ಮಾಡಿದರಾಯಿತು. ಪ್ರತಿಯೊಂದು ಗ್ರೂಪ್ ನ ಚಾನೆಲ್ ಗೆ ಬೇರೆ ಬೇರೆ ಫ್ರೀಕ್ವೆನ್ಸಿ ಮತ್ತು ಸಿಂಬಲ್ ರೇಟ್ ಇರುತ್ತದೆ ಅದು ಅಂತರ್ಜಾಲದಲ್ಲಿ ಸಿಗುತ್ತದೆ ಅಥವಾ ಸೆಟಲೈಟ್ ಎಂಡ್ ಕೇಬಲ್ ಟೀವಿಯಂತಹ ಅನೇಕ ಮ್ಯಾಗಜೀನ್ ಗಳಲ್ಲಿ ಅವುಗಳ ಪಟ್ಟಿಯೇ ದೊರೆಯುತ್ತದೆ, ಡಿಜಿಟಲ್ ರಿಸೀವರಿನ ಬಗ್ಗೆ ಹೆಚ್ಚು ಹೇಳಲು ಹೋದರೆ ಸುಮ್ಮನೆ ಬೋರ್ ಹೊಡೆಸಿದಂತಾಗುತ್ತದೆ,ಉಚಿತವಾಗಿ ದೊರೆಯುವ ಚಾನಲ್ಲುಗಳನ್ನು ಫ್ರೀ ಟು ಏರ್ ಚಾನೆಲ್ ಮತ್ತು ದುಡ್ಡು ಕಟ್ಟಿದರೆ ಮಾತ್ರ ನೋಡಬಹುದಾದ ಚಾನಲ್ಲುಗಳನ್ನು ಸ್ಕ್ರ್ಯಾಂಬಲ್ಡ್ ಚಾನೆಲ್ ಅಥವಾ ಪೇ ಚಾನೆಲ್ ಎಂದು ಕರೆಯುತ್ತಾರೆ. ಡಿಟಿಹೆಚ್ ಭಾರತದಲ್ಲಿ ಕಣ್ತೆರೆಯುವ ಮುನ್ನ ದುಡ್ಡು ಕಟ್ಟಿ ನೋಡುವ, (ಸ್ಕ್ರಾಂಬಲ್ಡ್ ) ಪೇ ಚಾನಲ್ ಗಳನ್ನು ಒಬ್ಬ ಗ್ರಾಹಕ ಸ್ವಂತವಾಗಿ ಪಡೆಯುವುದು ಅಸಾಧ್ಯದ ಮಾತಾಗಿತ್ತು, ಪೇ ಚಾನಲ್ ಗಳು ಕೇಬಲ್ ಸೇವೆ ಒದಗಿಸುವವರಿಗೆ ಮಾತ್ರ ಲಭ್ಯವಿತ್ತು ಅದರಲ್ಲಿಯೂ ಕನಿಷ್ಟ ೫೦೦ ಜನ ಗ್ರಾಹಕರನ್ನು ಹೊಂದಿರಬೇಕೆಂಬ ಶರತ್ತು ಅನ್ವಯವಾಗುತಿತ್ತು, ಏಕೆಂದರೆ ಇಂದು ಡಿ.ಟಿ.ಹೆಚ್ ಸೇವೆ ಉಪಯೋಗಿಸುತ್ತಿರುವ ಮನೆಗಳಲ್ಲಿ ಟೀವಿಯ ಜೊತೆ ಬಂದು ಕುಳಿತಿರುವ ಪುಟ್ಟ ಬಾಕ್ಸ್ ಗೆ ಸೆಟ್ ಟಾಪ್ ಬಾಕ್ಸ್ ಎಂದು ಕರೆಯಲಾಗುತ್ತಿದೆ ಅದು ಡಿಜಿಟಿಲ್ ರಿಸೀವರಿಗೆ ದೊರೆತಿರುವ ಮತ್ತೊಂದು ಹೆಸರಾಗಿದೆ.

  ಯಾವುದೇ ಒಂದು ಚಾನಲ್ ಬೇರೆ ಉಪಗ್ರಹದಿಂದ ಪ್ರಸಾರ ಆರಂಭಿಸಿದಾಗ ಹೊಸ ತರಂಗಾಂತರ(ಫ್ರೀಕ್ವೆನ್ಸಿ)ಯಲ್ಲಿ ಟೀವಿ ಚಾನಲ್ ಗಳು ಲಭ್ಯವಾಗುತ್ತವೆ, ಅವುಗಳು ಕೇಬಲ್ ಟೀವಿ ಉದ್ಯಮಕ್ಕೆ ಸಂಬಂದಪಟ್ಟ ಅನೇಕ ಮ್ಯಾಗ್ ಜೀನ್ ಗಳಲ್ಲಿ ಎಲ್ಲಾ ಉಪಗ್ರಹದ ಡೌನ್ ಲೋಡ್ ಪ್ರೀಕ್ವೆನ್ಸಿ ಮತ್ತು ಸಿಂಬಲ್ ರೇಟ್ ಸಿಗುತ್ತವೆ, ಬೇರೆ ಬೇರೆ ಉಪಗ್ರಹಗಳನ್ನು ಹುಡುಕಿ ಚಾನಲ್ ನೋಡುವ ಹವ್ಯಾಸ ಉಳ್ಳವರು ತಮ್ಮನ್ನು ಸ್ಯಾಟ್ ಟ್ರ್ಯಾಕರ್ ಎಂದು ಕರೆದುಕೊಳ್ಳುತ್ತಾರೆ, ಉದಾಹರಣೆಗೆ ಎಲ್ಲಾ ಉಪಗ್ರಹಗಳಿಂದ ಎಲ್ಲಾ ಕಡೆ ಚಾನಲ್ಲುಗಳು ಸಿಗುವುದಿಲ್ಲ, ಅವುಗಳ ಪ್ರಸಾರ ಯಾವ ಯಾವ ಖಂಡಗಳಲ್ಲಿ ಲಭ್ಯವಾಗುತ್ತವೆ ಎನ್ನುವುದನ್ನು ಫೂಟ್ ಪ್ರಿಂಟ್ ಎಂದು ಕರೆಯಲಾಗುತ್ತದೆ, ಇನ್ನು ಪ್ರಸಾರ ಯಾವ ತರಹದ್ದು ಎನ್ನುವುದರ ಮೂಲಕ ಅವುಗಳು ಎಲ್ಲೆಲ್ಲಿ ಲಭ್ಯವಾಗುತ್ತವೆ ಎಂದು ತಿಳಿದುಕೊಳ್ಳಬಹುದು, ವೈಡ್ ಬೀಮ್ ನಲ್ಲಿ ಚಾನಲ್ಲ್ ಪ್ರಸಾರವಾಗುತ್ತಿದ್ದರೆ ಹಲವು ದೇಶಗಳಿಗೆ ಖಂಡಗಳಿಗೆ ಆ ಚಾನಲ್ ಲಭ್ಯವಾಗುತ್ತವೆ, ಇನ್ನು ಝೋನ್ ಬೀಮ್ ಅಥವಾ ಏಶಿಯಾ ಬೀಮ್ ಹೀಗೆ ಎಲ್ಲೆಲ್ಲಿಗೆ ತಮ್ಮ ಚಾನಲ್ಲುಗಳು ಲಭ್ಯವಾಗುತ್ತವೆ ಎನ್ನುವುದನ್ನು ಫೂಟ್ ಪ್ರಿಂಟ್ ಮ್ಯಾಪ್ ಮೂಲಕ ತಿಳಿದುಕೊಳ್ಳಬಹುದಾಗಿದೆ.


     ಆದರೆ ಡಿಟಿಹೆಚ್ ಸೇವೆ ಸಂಪೂರ್ಣವಾಗಿ ಗ್ರಾಹಕನ ಇಚ್ಚೆಗೆ ತಕ್ಕಂತೆ ಸೇವೆ ಪಡೆಯಲು ಸಾದ್ಯವಾಗಿಲ್ಲ, ಸದ್ಯಕ್ಕೆ ಲಭ್ಯವಿರುವಂತ ಬೇರೆ ಬೇರೆ ಡಿಟಿಹೆಚ್ ಸೇವೆ ಒದಗಿಸುತ್ತಿರುವವರು ಪ್ರೀಪೇಯ್ಡ್ ಮೊಬೈಲ್ ಸೇವೆಯಂತೆಯೇ ಡಿ.ಟಿ ಹೆಚ್ ಸೆಟ್ ಟಾಪ್ ಬಾಕ್ಸ್ ನ ಜೊತೆಗೊಂದು ಸ್ಮಾರ್ಟ್ ಕಾರ್ಡ್ ಅನ್ನು ಒದಗಿಸುತ್ತಾರೆ ಅದು ಪ್ರೀಪೇಯ್ಡ್ ಸಿಮ್ ಕಾರ್ಡನಂತೆ ದುಡ್ದಿದ್ದರೆ ಮಾತ್ರ ಚಾನಲ್ ಗಳನ್ನು ವೀಕ್ಷಿಸಲು ಅನುವು ಮಾಡಿಕೊಡುತ್ತದೆ, ಇದರಲ್ಲಿ ಬೇಸರದ ವಿಚಾರವೆಂದರೆ ಪ್ರತಿ ಸೇವಾದಾತರು ಬೇರ‍ೆ ಬೇರೆ ಸ್ಕ್ರ್ಯಾಂಬ್ಲಿಂಗ್ ಟೆಕ್ನಾಲಜಿ ( ಪೇ ಚಾನಲ್ ಎನ್ ಕೋಡಿಂಗ್) ಬಳಸುತ್ತಿರುವುದರಿಂದ ಒಮ್ಮೆ ಒಂದು ಡಿ.ಟಿ ಹೆಚ್ ಸೇವೆ ಪಡೆದ ಮೇಲೆ ಮತ್ತೊಂದು ಡಿಟಿಹೆಚ್ ಸೇವೆ ಪಡೆಯಲು ಅಸಾದ್ಯ, ಬೇಕೇ ಬೇಕೆಂದರೆ ಹೊಸದಾಗಿ ಸೆಟ್ ಟಾಪ್ ಬಾಕ್ಸ್ ಮತ್ತು ಡಿಶ್ ಅನ್ನು ಹೊಸದಾಗಿ ಖರೀದಿ ಮಾಡಬೇಕಾಗುತ್ತದೆ, ಇನ್ನು ಅಂಗಡಿಯಾತ ತುಂಬಾ ಪರಿಚಯದವನಿದ್ದರೆ ೫೦೦ರೂಪಾಯಿ ಕಡಿಮೆ ಮಾಡಿ ಹೊಸ ಡಿಶ್ ಇಟ್ಟು ಕೊಂಡು ಬರೀ ರಿಸೀವರ್ ಒಂದನ್ನು ಕೊಡಬಹುದು, ಆದರೂ ದುಭಾರಿ ಎನಿಸದೇ ಇರಲಾರದು, ಉದಾಹರಣೆಗೆ ಒಂದು ಕಂಪೆನಿಯ ಡಿವಿಡಿ, ಅಥವಾ ಸೀಡಿ ಪ್ಲೇ ಮಾಡಲು ಅದೇ ಕಂಪನಿಯ ಪ್ಲೇಯರ್ ಅಥವಾ ಒಂದು ಕಂಪೆನಿಯ ಸಿಮ್ ಕಾರ್ಡ್ ನ ಸೇವೆ ಪಡೆಯಲು ಅದೇ ಕಂಪನಿಯ ಮೊಬೈಲ್ ಫೋನ್ ಬಳಸುವುದು ಅನಿವಾರ್ಯವಾಗಿದ್ದರೆ? (ರಿಲಾಯನ್ಸ್ ಮತ್ತು ಟಾಟಾ ಇಂಡಿಕಾಮ್ ಸಿ.ಡಿ ಎಮ್.ಎ ಸೇವೆ ಇದೇ ತರಹದ್ದಾಗಿತ್ತು ಈಗ ಅವೆರೆಡೂ ಕಂಪೆನಿಗಳು ಜಿ.ಎಸ್ ಎಮ್ ಸೇವೆ ಓದಗಿಸುತ್ತಿವೆ) ಸೀಡಿ ಕಂಪೆನಿಗಳು ಮತ್ತು ಮೊಬೈಲ್ ಸೇವೆ ಒದಗಿಸುತ್ತಿರುವ ಕಂಪೆನಿಗಳು ಖಂಡಿತಾ ಉದ್ದಾರವಾಗುತ್ತಿರಲಿಲ್ಲವೇನೋ! ಆದರೆ ಡಿ.ಟಿ ಹೆಚ್ ಕಂಪೆನಿಗಳು ಡಿಶ್ ಮತ್ತು ಸೆಟ್ ಟಾಪ್ ಭಾಕ್ಸನ್ನು ಗ್ರಾಹಕನಿಗೆ ಬಾಡಿಗೆ ಆಧಾರದ ಮೇಲೆ ಒದಗಿಸುತ್ತಿವೆ ಜಾಹೀರಾತಿನಲ್ಲಿ ಮಾತ್ರ ಸೆಟ್ ಟಾಪ್ ಬಾಕ್ಸ್ ಮತ್ತು ಡಿಶ್ ಉಚಿತ ಎಂದು ಬರೆದಿರುತ್ತದೆ ಅದರ ಜೊತೆಗೆ * ಚಿಹ್ನೆ ಇದ್ದು ಶರತ್ತುಗಳು ಅನ್ವಯಿಸುತ್ತವೆ ಎಂದು ಬರೆದಿರುತ್ತಾರೆ!, ಸೆಟ್ ಟಾಪ್ ಭಾಕ್ಸ್ ಮೇಲೆ ಸಂಪೂರ್ಣವಾದ ಹಕ್ಕು ಡಿ.ಟಿ ಹೆಚ್ ಸೇವಾದಾರರದ್ದೆ ಆಗಿರುತ್ತದೆ.ಪೇ ಚಾನಲ್ ಗಳನ್ನು ನಿರ್ದಿಷ್ಟವಾದ ಸ್ಕ್ಯಾಂಬ್ಲಿಗ್ ಟೆಕ್ನಾಲಜಿಯಲ್ಲಿ ಮಾತ್ರ ಸೇವೆ ಓದಗಿಸುವಂತೆ ಮತ್ತು ಗ್ರಾಹಕನಿಗೆ ತನಗಿಷ್ಟವಾದ ಕಂಪೆನಿಯ ಸೇವೆ ಪಡೆಯಲು ಬರಿ ಸ್ಮಾರ್ಟ್ ಕಾರ್ಡನ್ನು ಮಾತ್ರ ಪಡೆದು ಕೊಂಡು(ಮೊಬೈಲ್ ಸಿಮ್ ಖರೀದಿಸಿದಂತೆ) ಸೇವೆ ಪಡೆದುಕೊಳ್ಳುವಂತೆ ಮಾಡಲು ಟ್ರಾಯ್ ಯಾವುದೇ ಕ್ರಮ ತೆಗೆದುಕೊಳ್ಳಲಿಲ್ಲವೇ ಎನ್ನುವುದು ಆಶ್ಚರ್ಯಕರ ವಿಚಾರ. ಬೇಕಾದರೆ ಸೆಟ್ ಟಾಪ್ ಭಾಕ್ಸ್ ಗೆ ಇನ್ನು ಸ್ವಲ್ಪ ಹೆಚ್ಚಿನ ಹಣ ಪಡೆಯಲಿ, ಆದರೆ ಯಾವ ಶರತ್ತನ್ನು ವಿಧಿಸುವಂತಿಲ್ಲ ಹಾಗು ಯಾವ ಸೇವೆಯನ್ನು ಪಡೆದುಕೊಳ್ಳುವ ಹಕ್ಕು ಸಂಪೂರ್ಣ ಹಕ್ಕು ಗ್ರಾಹಕನದ್ದಾಗಿರುತ್ತದೆ ಎಂದು ಬರೆದುಕೊಡಲಿ, ಎಲ್ಲಾ ಕಂಪೆನಿಯವರ ಸ್ಮಾರ್ಟ್ ಕಾರ್ಡ್ ಗಳು ಒಂದೇ ಗ್ಲೋಬಲ್ ಸ್ಟ್ಯಾಂಡರ್ಡ್ ಗೆ ತರಬೇಕು ಇಲ್ಲವಾದಲ್ಲಿ ಸೇವೆ ಚನ್ನಾಗಿಲ್ಲದಿದ್ದರೂ ಅದನ್ನೆ ನೋಡುತ್ತಾ ಕೂರುವುದು ಅನಿವಾರ್ಯವಾಗುತ್ತದೆ.ಅಥವಾ ಇನ್ಯಾವುದೇ ಅತಿ ಕಡಿಮೆ ದರದಲ್ಲಿ ಅತ್ಯಂತ ಒಳ್ಳೆಯ ಪ್ಯಾಕೇಜ್ ಬೇರೆಯ ಕಂಪನಿಯವರು ನೀಡಿದರೆ ಅದರ ಪ್ರಯೋಜನ ಪಡೆಯಲು ಮತ್ತೆ ಹೊಸದಾಗಿ ರಿಸೀವರ್ ಎಲ್ಲವನ್ನು ಖರೀದಿಸುವುದು ದುಬಾರಿಯಾಗುತ್ತದೆ.

     ಡಿಟಿಹೆಚ್ ಸೇವಾದಾರರು ಗ್ರಾಹಕರಿಂದ ಭಾರಿ ಪ್ರಮಾಣದ ಹಣವನ್ನು ದೋಚುತ್ತಿದ್ದಾರೆ, ತಿಂಗಳಿಗೆ ಕನಿಷ್ಟವೆಂದರೂ ೧೦೦ ರಿಂದ ೩೦೦ ರೂಪಾಯಿಯ ತನಕ ಗ್ರಾಹಕ ಖರ್ಚು ಮಾಡಲೇ ಬೇಕಾಗಿದೆ, ಜೊತೆಗೆ ತೆರಿಗೆ ೧೨.೫ ಕಟ್ಟುವುದು ಅನಿವಾರ್ಯವಾಗಿದೆ.ಇದು ಸಾಮಾನ್ಯ ವರ್ಗದ ಗ್ರಾಹಕರಿಗೆ ಹೊರೆಯಾಗಿದೆ, ನೋಡಿದ್ದಕ್ಕಷ್ಟೆ ದುಡ್ಡು ಕಟ್ಟುವ(Pay per view) ಸೇವೆ ಆರಂಭವಾಗಬೇಕು ಅಥವಾ ಪ್ಯಾಕೇಜ್ ಬದಲು ಬೇಕಾದ ಚಾನಲ್ಲುಗಳನ್ನು ಆಯ್ಕೆ ಮಾಡಿಕೊಳ್ಳುವ ಸ್ವಾತಂತ್ರ್ಯ ಇನ್ನೂ ಲಭ್ಯವಾಗಿಲ್ಲ, ಉದಾಹರಣೆಗೆ ಯಾವುದೋ ಒಂದು ಚಾನೆಲ್ ಬೇಕಾದಲ್ಲಿ ಆ ಚಾನೆಲ್ ಒಂದನ್ನು ನೋಡಲು ಇಡೀ ಪ್ಯಾಕೇಜ್ ಗೆ ಹಣ ವ್ಯಯಿಸಬೇಕು ಇಡೀ ಪ್ಯಾಕೇಜ್ ನಲ್ಲಿ ಉಳಿದ ಚಾನಲ್ ಗಳನ್ನು ನೀವು ನೋಡುವ ಆಸಕ್ತಿಯಿಲ್ಲದಿದ್ದರೂ ದುಡ್ಡು ಕಟ್ಟಲೇ ಬೇಕು, ಕೆಲವು ಒಂದೇ ಚಾನಲ್ ಆಯ್ಕೆ ಲಭ್ಯವಿದೆ ಆದರೆ ಕನಿಷ್ಟವೆಂದರೂ ೨೫ ರಿಂದ ೩೦ರೂಪಾಯಿ ಒಂದು ತಿಂಗಳಿಗೆ ವ್ಯಯಿಸಬೇಕು, ಇದು ದುಬಾರಿ ಲೆಕ್ಕಾಚಾರವೇ ಆಯಿತು, ಇನ್ನು ಕೆಲವು ಪ್ಯಾಕೇಜ್ ಆಯ್ಕೆ ಮಾಡಿಕೊಂಡರೆ ಅದನ್ನು ಮತ್ತೆ ಅಷ್ಟು ಸುಲಭದಲ್ಲಿ ನಿಶ್ಕ್ರೀಯ ಗೊಳಿಸಲು ಸಾಧ್ಯವಿಲ್ಲ ನಿಮ್ಮ ಖಾತೆಯಲ್ಲಿ ಹಣ ಖಾಲಿಯಾದಾಗ ಮಾತ್ರ ಆ ಪ್ಯಾಕೇಜ್ ಕೊನೆಗೊಳ್ಳುತಿತ್ತು.. ಸನ್ ಡೈರೆಕ್ಟ್ ನಲ್ಲಿ ಈಗ ಸ್ವಲ್ಪ ಬದಲಾವಣೆಯಾಗಿವೆ, ಒಂದು ತಿಂಗಳಿಗೆ ಚಂದಾದಾರರಾಗುತ್ತೀರೋ ಅಥವಾ ಯಾವಾಗಲೂ ಚಂದಾ ಹಣ ಕಟ್ಟುತ್ತಲೇ ಇರುತ್ತೀರೋ ಎನ್ನುವುದನ್ನು ಆಯ್ಕೆ ಮಾಡಿಕೊಳ್ಳುವ ಸ್ವಾತಂತ್ರ್ಯ ಕೊಡಲಾಗಿದೆ! ಒಮ್ಮೆ ನೀವು ನಿಮ್ಮ ಚಂದಾ ಹಣ ಕಟ್ಟುವುದು ಒಂದು ದಿನ ತಡವಾದರೂ ಮುಂದಿನ ೨೪ ಘಂಟೆಗಳ ವರೆಗೆ ನಿಮಗೆ ಯಾವುದೇ ಚಾನಲ್ ಲಭ್ಯವಾಗುವುದಿಲ್ಲ.. ಉಚಿತವಾಗಿ ಪ್ರಸಾರವಾಗುತ್ತಿರುವ ಡಿಡಿ ಡೈರೆಕ್ಟ್ ಪ್ಲಸ್ ನ ಚಾನಲ್ಲುಗಳನ್ನು ಸಹ ಬ್ಲಾಕ್ ಮಾಡುತ್ತಾರೆ, ಇವಕ್ಕೆಲ್ಲ ಕಡಿವಾಣ ಹಾಕಲು ಸೂಕ್ತ ಕ್ರಮ ಟ್ರಾಯ್ ಕೈಗೊಳ್ಳಬೇಕಿದೆ.

     ಇನ್ನು ನಾನು ಅತಿ ಆಸಕ್ತಿಯಿಂದ ಕಾಯುತ್ತಿರುವುದು ಡಿಟಿ ಹೆಚ್ ನ ಮೂಲಕ ಬ್ರಾಡ್ ಬ್ಯಾಂಡ್ ಸೇವೆಗೆ, ನನ್ನಂತೆ ಬಿಎಸ್ ಎನ್ಎಲ್ ನ ಕೇಬಲ್ ಸೇವೆಯಿಂದ ಬ್ರಾಡ್ ಬ್ಯಾಂಡ್ ಸೇವೆ ಪಡೆಯುವ ಹಕ್ಕಿನಿಂದ ವಂಚಿತರಾದ ಮತ್ತು ವೈರ್ ಲೆಸ್ ಲ್ಯಾಂಡ್ ಲೈನ್ ನ ಮೂಲಕ ಫಾಸ್ಟ್ ಇಂಟರ್ನೆಟ್ ಎನ್ನುವ ಹೆಸರಿನ ಅನಿಯಮಿತ ಅತಿ ನಿಧಾನಗತಿಯ ಡಯಲ್ ಅಪ್ ಸೇವೆಯಿಂದ ಬೇಸತ್ತಿರುವ ಗ್ರಾಹಕರಿಗೆ ಬ್ರಾಡ್ ಬ್ಯಾಂಡ್ ಅನುಭವ ಸಿಗಲಿ ಎನ್ನುವ ಆಶಯ. ( ಇದ್ದಿದ್ದರಲ್ಲಿ ಫೊನ್ ಬಿಲ್ ಜೊತೆ ೨೫೦ರುಪಾಯಿ ಮಾಸಿಕ ಬಾಡಿಗೆ ಮಾತ್ರ ಹೆಚ್ಚುವರಿಯಾಗಿ ಕಟ್ಟಬೇಕು) Anyways Thanks to BSNL WLL fast internet serviece! ಕೊನೆಯ ಮಾತು ಡೈರೆಕ್ಟ್ ಟು ಹೋಮ್ ಸರ್ವೀಸ್ ನಲ್ಲಿ ಕೈಗೆಟಕುವ ಬೆಲೆಗೆ ಇಂಟರ್ನೆಟ್ ಸೇವೆ ಬಂದರೆ ಮಾತ್ರ ಚಂದಾದಾರರಾಗಿ, ಲೆಕ್ಕಾಚಾರ ಇರಬೇಕಲ್ವಾ ಎಲ್ಲದಕ್ಕೂ.ನಾನು ಬರೆದದ್ದರಲ್ಲಿ ಸಾಕಷ್ಟು ಮಾಹಿತಿ ದೊರೆತಿರಬಹುದು ಎಂದುಕೊಳ್ಳುತ್ತೇನೆ.

13 comments:

Harish - ಹರೀಶ said...

ಸುಮಾರು research ಮಾಡಿದ್ಯಲೋ... ಒಳ್ಳೇ informative ಲೇಖನ

mgbhat said...

devarane innu full odakke agalle odakke try madtha
iddi....deepavali munche odi reply madthi....adachanegagi kashamisi.....

ಸಂದೀಪ್ ಕಾಮತ್ said...

ಉತ್ತಮ ಲೇಖನ.

Machikoppa said...

ನಾವು ಅನುಭವಿಸಿದ್ದನ್ನ ಚೆನ್ನಾಗಿ ಬರೆದಿದ್ದೀರಿ.
ನಾವು 17000 ಕೊಟ್ಟು ಟೀ ವಿ ತಗಂಡಿದ್ದು ಜ್ಞಾಪಕಕ್ಕೆ ಬರತ್ತೆ. ಕಯ್ಯಲ್ಲಿ ತಿರುಗಿಸೋ ಡಿಶ್ ಬದಲು ನಾವು ಬುಡದಲ್ಲಿ ಮೋಟರ್ ಇದ್ದ ಡಿಶ್ ತಗನ್ಡಿದ್ವು. ಅವೆಲ್ಲ ಈಗ ಅಟ್ಟ ಸೇರಿದೆ.

Chamaraj Savadi said...

ತುಂಬ ಚೆನ್ನಾಗಿ ಮಾಹಿತಿ ಹೆಕ್ಕಿ ನೀಡಿದ್ದೀರಿ. ಟ್ರಾಯ್‌ ಕೂಡಾ ಕಮಿಷನ್‌ ಏಜೆಂಟ್‌ ಥರದ ಸಂಸ್ಥೆ. ಕಂಪನಿಗಳಿಗೆ ದೋಚಲು ಸಾಕಷ್ಟು ಅವಕಾಶ ಮಾಡಿಕೊಟ್ಟ ನಂತರವಷ್ಟೇ ಅದು ಮುಂದಿನ ಕ್ರಮಗಳನ್ನು ಕೈಗೊಳ್ಳುವುದು. ಮೊಬೈಲ್‌ ಕಂಪನಿಗಳು ಲಾಭ ಮಾಡಿಕೊಂಡಿದ್ದೇ ಹೀಗೆ. ನಮಗೆ ಬೇಕಾದ ಸಿಮ್‌ ಇಟ್ಟುಕೊಂಡು, ಸೇವೆ ಪಡೆಯಲು ಬೇಕಾದ ಕಂಪನಿಯನ್ನು ಆಯ್ಕೆ ಮಾಡಿಕೊಳ್ಳುವ ಪ್ರಸ್ತಾಪ ಹಲವಾರು ವರ್ಷಗಳಿಂದ ನೆನೆಗುದಿಗೆ ಬಿದ್ದಿದ್ದೇ ಈ ಕಾರಣಕ್ಕೆ. ಈಗ ಡಿಟಿಎಚ್‌ ಸರದಿ. ಸಾಕಷ್ಟು ದೋಚಲು ಅವಕಾಶ ಮಾಡಿಕೊಟ್ಟ ನಂತರ, ನೀವು ಪ್ರಸ್ತಾಪಿಸಿದ ಬದಲಾವಣೆಗಳು ಜಾರಿಯಾಗಬಹುದೇನೋ.

ಒಟ್ಟಿನಲ್ಲಿ ಉತ್ತಮ ಲೇಖನ.

shreeshum said...

Abba istella kathe iddala

ಮಾವೆಂಸ said...

ಟ್ರಾಯ್ ಎಂಬ ಸ್ವಾಯತ್ತ ಸಂಸ್ಥೆ ಗ್ರಾಹಕರ ಪರವಿರುವ ಪೂರಾಪೂರ ವ್ಯವಸ್ಥೆಯಲ್ಲ. ಅತ್ತ ಗ್ರಾಹಕರಿಗೆ, ಇತ್ತ ಸೇವಾದಾತರಿಗೆ ಅನ್ಯಾಯವಾಗದ ಹಾಗೆ ನೋಡಿಕೊಳ್ಳುವ ಮತ್ತು ಅದೇ ಕಾಲದಲ್ಲಿ ಟೆಲಿಕಾಂ ಕ್ಷೇತ್ರದಲ್ಲಿ ಸ್ಪರ್ಧಾತ್ಮಕ ವಾತಾವರಣ ಸೃಷ್ಟಿಯಾಗುವಂತಾಗಲೂ ನೋಡಿಕೊಳ್ಳುತ್ತದೆ.

ಸಾಗರದಾಚೆಯ ಇಂಚರ said...

ಒಳ್ಳೆಯ ಸಂಶೋಧನೆ ನಿಮ್ಮದು, ಈಗೀಗ ಇಂಥಹ ಡಿಶ್ ಗಳು ಕಾಣ ಸಿಗುತ್ತಿಲ್ಲ,
ಇಲ್ಲದಿದ್ದರೆ ಮೊದಲೆಲ್ಲ ಡಿಶ್ ತಿರುಗಿಸುವುದೇ ದೊಡ್ಡ ಕೆಲಸವಾಗುತ್ತಿತ್ತು

ಮೂರ್ತಿ ಹೊಸಬಾಳೆ. said...

ಮಾಹಿತಿ ಸಂಗ್ರಹದಲ್ಲಿ ನಿಮ್ಮ ಶ್ರಮ ನೋಡಿ ನನಗೂ ಅಬ್ಬಬ್ಬಾ ಎಂಬ ಉದ್ಗಾರ ಹೊರಟಿದ್ದು ಸುಳ್ಳಲ್ಲ.

ಮನಸ್ವಿ said...

@ಹರೀಶ
ತ್ಯಾಂಕ್ಯೂ...

@ಎಂ ಜಿ ಭಟ್ಟ
ಹೂಂ ಇನ್ನು ಬರಿಯಕ್ಕೆ ಬೇಕಾದಷ್ಟು ಇತ್ತು ಆದ್ರೆ ಓದುಗರ ಹಿತ-ದೃಷ್ಟಿ(vision) ಗೆ ದಕ್ಕೆಯಾಗದಿರಲಿ ಅಂತ ಇಷ್ಟೇ ಬರದ್ದಿ, ಅಂದಹಾಗೆ ಕಾದಂಬರಿ ಹೇಗಿದೆ ಅಂತ ಗೊತ್ತಾಗೋಕೆ ಮೊದಲನೆ ಪುಟ ಮತ್ತು ಕೊನೆಯ ಪುಟ ಓದೋದು ಹೆಚ್ಚಿನ ಜನರ ಹವ್ಯಾಸ, ಅದೇ ರೀತಿ ಪೂರ್ತಿ ಓದಕ್ಕೆ ಆಗದೇ ಹೋದರೂ ಕೊನೆಯ ೨ ಪ್ಯಾರ ಓದಿ ಅನಿಸಿಕೆ ತಿಳಿಸಿ.

@ಸಂದೀಪ್ ಕಾಮತ್
ಧನ್ಯವಾದಗಳು

@Machikoppa
ಹ್ಮ್... ಆದರೆ ನಮ್ಮ ಮನೆಯಲ್ಲಿ ಡಿಟಿಹೆಚ್ ಜೊತೆಗೆ ೨ ದೊಡ್ಡ ಡಿಶ್ ಗಳು ಸುಸ್ಥಿತಿಯಲ್ಲಿ ಇವೆ (ಚಿತ್ರಗಳಲ್ಲಿ ಇವೆ ನೋಡಿ).ಡಿಟಿಹೆಚ್ ನಲ್ಲಿ ಬಾರದ ಕೆಲವು ಚಾನಲ್ಲುಗಳು ಅಲ್ಲಿ ಲಭ್ಯವಿದೆ. ಉದಾಹರಣೆಗೆ ಸುವರ್ಣ ನ್ಯೂಸ್ ಚಾನಲ್ ನಮ್ಮ ಮನೆಯ ಡಿಟಿಹೆಚ್ ನಲ್ಲಿ ಲಭ್ಯವಿಲ್ಲ, ಕಸ್ತೂರಿ ಚಾನಲ್ಲು ಬೇಕೆಂದರು ಹಳೆಯ ರಿಸಿವಿರ್ ಆನ್ ಮಾಡಿದರಾಯಿತು :) ಹಳೆಯ ಡಿಶ್ ಗಳೊಂದಿಗೆ ಅನೇಕ ವರ್ಷಗಳ ನಂಟು ಇದೆ, ಬಿಡುವಿನ ಸಮಯದಲ್ಲಿ ಡಿಶ್ ಗಳನ್ನು ತಿರುಗಿಸೋದು ಹೊಸ ಚಾನಲ್ ಯಾವುದಿದೆ ನೋಡೋದು ನನ್ನ ನೆಚ್ಚಿನ ಹವ್ಯಾಸವಾಗಿದೆ.

@Chamaraj Savadi
ಧನ್ಯವಾದಗಳು.. ಖುಷಿ ಆಯ್ತು. ಸುವರ್ಣ ನ್ಯೂಸ್ ತುಂಬಾ ಚನ್ನಾಗಿ ಮೂಡಿ ಬರುತ್ತಿದೆ.

@Shreeshum
ಧನ್ಯವಾದಗಳು.

@ಮಾವೆಂಸ
ಮಾಹಿತಿ ನೀಡಿದ್ದಕ್ಕೆ ಧನ್ಯವಾದಗಳು!!, ಅಂದಹಾಗೆ ಬರೀ ಕಮೆಂಟ್ ಮಾತ್ರ ಓದಿದ ಹಾಗಿದೆ, ನಾನು ಬರೆದದ್ದನ್ನು ಯಾವಾಗ್ ಓದ್ತೀರ??

@ಸಾಗರದಾಚೆಯ ಇಂಚರ
ಧನ್ಯವಾದಗಳು.. ನಮ್ಮನೆಗೆ ಬನ್ನಿ ನೋಡ್ಕೋಂಡ್ ಹೋಗ್ಬೋದು ;)

@ಮೂರ್ತಿ ಹೊಸಬಾಳೆ
ಧನ್ಯವಾದಗಳು..

mvadu said...

೧೦ ವರ್ಷ ಹಿಂದೆ ಹೋಗಿ ಬಂದ ಅನುಭವ ಆಯಿತು.. ೧೯೯೯ರಲ್ಲಿ ಮನೆ ಪಕ್ಕ 8" ಕೊಡೆ ಕೂರಿಸಿದ್ದಾಗಿತ್ತು.. ೧೦ ಗಂಟೆ ತನಕ ಎಲ್ಲರು ಕುಳಿತು ರಾತ್ರಿ ೮:೩೦ ನಂತರವೂ ಕನ್ನಡ ಕಾರ್ಯಕ್ರಮ ನೋಡುವ ಮಜಾ ಒಂದು ಕಡೆ (ದೂರದರ್ಶನ ೮:೩೦ ಕ್ಕೆ ನ್ಯಾಷನಲ್ ಗೆ ಬದಲಾಗುತ್ತಿತ್ತು), ರಾತ್ರಿ ಎಲ್ಲರು ಮಲಗಿದ ಮೇಲೆ ಕುರುಡು ಬ್ಯಾಟರಿ ಬೆಳಕಿನಲ್ಲಿ ಡಿಶ್ ತಿರುಗಿಸಿ ಟ್ಯೂನ್ ಮಾಡಿ ಬಿಸಿ ಬಿಸಿ ಕಾರ್ಯಕ್ರಮ ನೋಡುವ ಹುಡುಗಾಟದ ಮಜಾ ಇನ್ನೊಂದೆಡೆ.. ಅದನ್ನು ಶಾಲೆಯಲ್ಲಿ ಗೆಳೆಯೆರ ಎದುರು ವರ್ಣಿಸಿ ಹೊಟ್ಟೆ ಉರಿಸಿದ್ದು.. ಆಮೇಲೆ ಡಿಜಿಟಲ್ ಜಗತ್ತಿನಲ್ಲಿ ಸಾಗರದ ಕೇಬಲ್ ಆಪರೇಟರ್ ಗೆಳೆತನದಿಂದ classified ಕಾರ್ಯಕ್ರಮಗಳು ಸಿಕ್ತ ಇದ್ದಿದ್ದ.. ಆಮೇಲೆ ಎಲ್ಲ ಚಾನೆಲ್ಲಗಳು scrabmled (paid) ಅದ ಮೇಲೆ, ಮನೆಯಲ್ಲಿ ಕನ್ನಡ ಇಲ್ಲದೆ ಟಿವಿ ಇಲ್ಲೆ ಅನ್ನೋ ಹಾಗೆ ಆಗಿ ಕೇಬಲ್ ನತ್ತ ವಾಲಿದ್ದಾಗಿತ್ತು.. ಈಗ ಅಮೇರಿಕಾದಲ್ಲಿ ಕುಳಿತು ಡಿಜಿಟಲ್ ಕೇಬಲ್ ನಲ್ಲಿ >೧೦೦ ಟಿವಿ ಚಾನೆಲ್ಲುಗಳು, ಅಷ್ಟೇ HD(1080i interlaced lines compared to 480 interalced scan lines) ಚಾನೆಲ್ಲುಗಳು, ಅದೇ ಕೇಬಲ್ನಲ್ಲಿ 15MbPS ಬ್ರಾಡ್ಬ್ಯಾಂಡ್ ಅಂತರ್ಜಾಲ ಸೇವೆ ಅನುಭವಿಸುತ್ತಿರುವಾಗ ಹಳೆಯ ೮" ಕೊಡೆಯ ನೆನಪು "ಮದುರ"

Lozil said...

ಏನೋ ಒಂದು ಹಳೆಯ ಕಾಲಕ್ಕೆ ಹೋಗಿ ವಾಪಸ್ ಬರುವ ಅನುಭವ. ಓದಿ ಹಳೆಯ ಡಿಶ್ ಪ್ರಮೇಯಗಳು ನೆನಪು ಬಂದವು. ಡಿ ಟಿ ಹೆಚ್ ನಲ್ಲಿ ಬ್ರಾಡ್ಬ್ಯಾಂಡ್ ಸೇವೆ ನನ್ನೋದೊಂದ್ ಕನಸು. ಅದು ನನಸಾಗಲು ಇನ್ನು ಎಷ್ಟು ವರ್ಷ ಕಾಯಬೇಕೋ ದೇವರಿಗೆ ಗೊತ್ತು. :(

ಮನಸ್ವಿ said...

@Lozil
ಹ್ಮ್... ನೀವು ಹೇಳಿದ್ದು ನಿಜ, ಬಿಎಸ್ಎನ್ಎಲ್ ದೇಶದ ಅನೇಕ ಪ್ರದೇಶಗಳಲ್ಲಿ ವೈ ಮಾಕ್ಸ್ ತಂತ್ರಜ್ಞಾನದಲ್ಲಿ ನಿಸ್ತಂತು ಬ್ರಾಡ್ ಬ್ಯಾಂಡ್ ಸೇವೆ ಓದಗಿಸಲು ಸಜ್ಜಾಗುತ್ತಿದೆ ಇದು ಒಂದು ಆಶಾಕಿರಣವಾಗಿದೆ...